காதலி கொடுத்த ஜூஸ் குடித்து இறந்த இளைஞர்? - மர்ம மரணம் குறித்து விசாரிக்கும் போலீஸ்

கேரள மாநிலம் திருவனந்தபுரம் மாவட்டம் பாறசாலையைச் சேர்ந்த ஜெயராஜன் என்பவரின் மகன் ஷாரோன்ராஜ்(23). பி.எஸ்சி மூன்றாம் ஆண்டு படித்து வந்தார். ஷாரோன் ராஜ் களியக்காவிளை அருகே ராமவர்மன்சிறை பகுதியைச் சேர்ந்த இளம் பெண்ணை காதலித்துள்ளார். இதற்கிடையே அந்த இளம் பெண்ணுக்கு வேறு ஒருவருடன் நிச்சயம் செய்யப்பட்டுள்ளதாக கூறப்படுகிறது. ஆனாலும், வீட்டுக்குத் தெரியாமல் ஷாரோன் ராஜை அந்த இளம் பெண் காதலித்து வந்திருக்கிறார். ஷாரோன் ராஜிக்கு கல்லூரி சம்பந்தப்பட்ட ரெக்கார்ட் நோட்டுக்கள் எழுதி கொடுப்பது போன்ற உதவிகளை இளம் பெண் செய்து வந்துள்ளார். இரு நோட்டு எழுதி முடித்து வைத்திருபதாக கடந்த 14-ம் தேதி அந்த இளம் பெண் ஷாரோன் ராஜை தனது வீட்டுக்கு அழைத்துள்ளார். ஷாரோன் ராஜ் தனது நண்பரின் பைக்கில் காதலியின் வீட்டுக்குச் சென்றுள்ளார். நண்பர் வெளியே பைக்கில் காத்திருந்திருக்கிறார். ஷாரோன்ராஜ் அந்த பெண்ணின் வீட்டுக்குள் சென்றுள்ளார். அப்போது அவரின் பெற்றோர் வீட்டில் இல்லை என கூறப்படுகிறது. சிறிது நேரத்தில் வீட்டைவிட்டு வெளியே வந்த ஷாரோன் ராஜ் வாந்தி எடுத்துள்ளார்.

பாறசாலை காவல் நிலையம்

பைக்கில் இருந்த அவரது நண்பர் ஏன் வாந்தி எடுக்கிறாய் எனக்கேட்டதற்கு, `ஜூஸ் குடித்தது ஒத்துக்கொள்ளவில்லை’ எனக் கூறியுள்ளார் ஷாரோன் ராஜ். இந்த நிலையில் வீட்டுக்குச் சென்றபிறகு அவரின் உடல்நிலை மோசமானது. அதைத் தொடர்ந்து பாறசாலையில் உள்ள அரசு மருத்துவமனையில் சிகிச்சைக்காக சேர்க்கப்பட்டார். அங்கு அவரின் உடல்நிலை மோசமானதைத் தொடர்ந்து திருவனந்தபுரம் அரசு மெடிக்கல் காலேஜ் ஆஸ்பத்திரியில் சேர்க்கப்பட்டார். அங்கு சிகிச்சையில் இருந்த ஷாரோன் ராஜின் உடல் உறுப்புகள் செயல் இழந்துள்ளன. அவர் ஆசிட் போன்ற விஷம் குடித்திருக்கலாம் என மருத்துவர்கள் தெரிவித்துள்ளனர்.

இதுகுறித்து ஷாரோன் ராஜின் தந்தை போலிஸில் புகார் அளித்ததை தொடர்ஞு மாஜிஸ்திரேட் மருத்துவமனையில் சென்று வாக்குமூலம் பெற்றுள்ளார். அந்த இளம் பெண் கசப்பான மருந்து ஒன்றை குடித்து வருவதாகவும், அது எப்படி இருக்கும் என வாங்கி குடித்து பார்த்ததாக ஷாரோன் ராஜ் கூறியுள்ளார். கசப்பை போக்க அந்த பெண் ஜூஸ் கொடுத்துள்ளார். அதை குடித்த பிறகு உடல்நிலை சரியில்லாமல் போனதாக ஷாரோன் ராஜ் தெரிவித்துள்ளார். இந்த நிலையில் கடந்த 25-ம் தேதி ஷாரோன் ராஜ் இறந்துவிட்டார்.

ஷாரோன்ராஜ்

எனவே அந்த இளம் பெண் கொடுத்த ஜூசில் எதாவது கலாதிருக்கலாம் என பெற்றோர் சந்தேகத்தை கிளப்பியுள்ளனர். ஆனால், தான் குடித்து வந்த மருந்தைதான் ஷாரோன் ராஜிக்கு கொடுத்ததாகவும், ஜூஸில் வேறு எதுவும் கலக்கவில்லை எனவும் இளம் பெண் போலீஸ் விசாரணையில் தெரிவித்துள்ளார். இது குறித்து போலீஸார் தீவிர விசாரணை நடத்தி வருகின்றனர்.

from தேசிய செய்திகள் https://ift.tt/FTvhXUR