விஜய்யின் தமிழக வெற்றிக் கழகத்தின் முதல் மாநாடு பெரும் எதிர்பார்ப்புகளுக்கு மத்தியில் இன்று மாலை நான்கு மணியளவில் விக்கிரவாண்டி வி. சாலையில் இன்று நடைபெறவிருக்கிறது. தமிழ்நாட்டின் மூவேந்தர்கள், வேலு நாச்சியார், அஞ்சலையம்மாள் போன்ற சுதந்திரப் போராட்ட வீராங்கனைகள், அம்பேத்கர், பெரியார், காமராஜர் உள்ளிட்ட தலைவர்களின் கட் அவுட்கள் அமைக்கப்பட்ட மாபெரும் மாநாட்டுத் திடலில், வரும் தொண்டர்களுக்குச் சிற்றுண்டி வசதி, ஆம்புலன்ஸ், மருத்துவ கூடாரங்கள், பார்க்கிங் வசதி, கழிவறை வசதி என அடிப்படை வசதிகள் செய்யப்பட்டிருக்கின்றன.
மறுபக்கம், நேற்றிரவே மாநாட்டுத் திடலுக்கு விஜய் வந்துவிட்ட நிலையில், இன்று அதிகாலை முதலே தொண்டர்கள் மாநாட்டுத் திடலுக்கு வரத் தொடங்கிவிட்டனர். நடிகர்கள், அரசியல் தலைவர்கள் உள்ளிட்ட பலரும் தங்களின் வாழ்த்துகளை விஜய்க்கு தெரிவித்து வருகின்றனர். இவ்வாறான, பரபரப்புக்கு மத்தியில் விஜய் இன்றைய மாநாட்டில் என்ன பேசப்போகிறார், கொள்கைகள் என்ன அறிவிக்கப்போகிறார் என்பது பெரும் எதிர்பார்ப்பைக் கூட்டியிருக்கிறது.
இந்த நிலையில், விசிக துணைப் பொதுச் செயலாளர் ஆதவ் அர்ஜுனா, ``தமிழக வெற்றிக் கழகத்தின் சார்பில் அக்கட்சியின் முதல் மாநில மாநாடு அதன் தலைவர் சகோதரர் விஜய் தலைமையில் இன்று விக்கிரவாண்டியில் நடக்க இருக்கிறது. மாநாட்டு மேடையைச் சுற்றி அமைக்கப்பட்டுள்ள முகப்புகளில் தமிழ்நாடு அரசியலின் கொள்கை ஆசான் தந்தை பெரியார், இந்திய அரசியலின் அடையாளம் புரட்சியாளர் அம்பேத்கர், மக்கள் தலைவர் பெருந்தலைவர் காமராசர், அடிமைத்தனத்தை எதிர்த்த வீர பெண் களப்போராளிகள் வேலுநாட்சியார், அஞ்சலை அம்மாள் ஆகியோரின் படங்களை வைத்து தமிழ் மக்களின் பொது மனநிலையையும், உறுதியான இலட்சிய அரசியலையும் வெளிச்சம் போட்டுக் காட்டியிருக்கிறார்.
தொடர்ந்து, தனது அரசியல் பயணத்தை இதன் வழி அமைத்துக் கொள்வதன் மூலம் கொள்கை ரீதியான அரசியல் களத்தில் முக்கிய பங்காற்றிடவும், அவரது இந்த மாநாடு வெற்றி பெற வேண்டும் எனவும் சகோதரர் விஜய்யை வாழ்த்தி வரவேற்கிறேன்." என்று எக்ஸ் தளத்தில் வாழ்த்து தெரிவித்திருக்கிறார்.
from India News https://ift.tt/dYJlSRw
0 Comments