தொகுதிப் பங்கீடு: திமுக-விசிக இடையே 2-ம் கட்ட பேச்சுவார்த்தை!
மக்களவைத் தேர்தல் நெருங்கிக் கொண்டிருக்கும் வேளையில், அரசியல் கட்சிகள், கூட்டணிப் பேச்சுவார்த்தை, தொகுதிப் பங்கீடு என மும்முரமாக இயங்கிக் கொண்டிருக்கின்றன. அந்த வகையில் தமிழ்நாட்டில், ஆளும் தி.மு.க தலைமையிலான கூட்டணியில் தேர்தல் வேலைகள் பரபரத்துக் கொண்டிருக்கின்றன. தி.மு.க தலைமையிலான கூட்டணியில் காங்கிரஸ், கம்யூனிஸ்ட், வி.சி.க, ம.தி.மு.க, முஸ்லிம் லீக், கொ.ம.தே.க உள்ளிட்ட கட்சிகள் இருக்கின்றன. வரும் தேர்தலில் கூட்டணி கட்சிகளுடன் தொகுதிகளை பங்கீட்டு கொள்வதற்காக குழுவை தி.மு.க அமைத்திருக்கிறது. இதில் தி.மு.க கூட்டணியில் இந்திய யூனியன் முஸ்லிம் லீக், கொங்கு மக்கள் தேசிய கட்சிக்கு கடந்த வாரம் தலா ஒரு இடம் ஒதுக்குவதற்கான ஒப்பந்தம் கையெழுத்தானது.
அந்த வரிசையில் இந்திய கம்யூனிஸ்ட் கட்சி, மார்க்சிஸ்ட் கம்யூனிஸ்ட் கட்சிக்கு தலா இரண்டு இடங்கள் ஒதுக்கப்பட்டது. ஆனால் காங்கிரஸ், ம.தி.மு.க, வி.சி.க, மக்கள் நீதி மய்யம் உள்ளிட்ட கட்சிகளுடன் இடங்களை பகிர்ந்து கொள்வதில் இழுபறி நிலவி வருகிறது. இந்த நிலையில், தொகுதிப் பங்கீடு தொடர்பாக தி.மு.க-வி.சி.க இடையே இன்று இரண்டாம் கட்ட பேச்சுவார்த்தை நடைபெறவுள்ளது. சென்னை அண்ணா அறிவாலயத்தில் நடைபெறும் பேச்சுவார்த்தையில் தி.மு.க பொருளாளர் டி.ஆர்.பாலு தலைமையிலான குழுவுடன், வி.சி.க தலைவர் திருமாவளவன் உட்பட அந்தக் கட்சியின் முக்கிய நிர்வாகிகள், பேச்சுவார்த்தை நடத்தவிருக்கின்றனர்.
from India News https://ift.tt/9mR5iTH
0 Comments