அதிமுக ஆட்சியில் ஆளுநருக்கு கொடுக்கப்பட்ட நிதி... பிரச்னையை கிளப்பிய பிடிஆர் - பின்னணி என்ன?!

தமிழ்நாடு சட்டப்பேரவையில் 2023-24-ம் ஆண்டுக்கான நிதிநிலை அறிக்கை மார்ச் 20-ம் தேதி தாக்கல் செய்யப்பட்டது. பின்னர் அடுத்த நாள் வேளாண் நிதிநிலை அறிக்கை தாக்கல் செய்யப்பட்டது. இதனைத் தொடர்ந்து நிதிநிலை அறிக்கைகள் மீதான விவாதங்கள் நடைபெற்றது. இதையடுத்து மானிய கோரிக்கைகள் மீதான விவாதம் நடைபெற்று வருகிறது. இதன் அடிப்படையில், அ.தி.மு.க சட்டமன்ற உறுப்பினர் எஸ்.பி. வேலுமணி, பள்ளி மாணவர்களுக்கான காலை சிற்றுண்டி திட்டத்தை அட்சய பாத்திரம் என்ற திட்டமாக அ.தி.மு.க ஆட்சியில் அறிமுகப்படுத்தப்பட்டது என்று கூறினார்.

இதற்கு பதிலளித்து பேசிய நிதியமைச்சர் பி.டி.ஆர். பழனிவேல் தியாகராஜன், ``ஆளுநர் மாளிகைக்கு கொடுக்கப்பட்ட ஒதுக்கீடு செலவுகள் குறித்து ஆய்வு செய்யப்பட்டது. கடந்த 2018-19 ஆண்டு வரை ரூ.50 லட்சம் பணம் discretionary fund (விருப்ப நிதி) ஆக ஒதுக்கப்பட்டுள்ளது. பின்னர் 2019-ம் ஆண்டுக்கு பிறகு திடீரென்று 50 லட்சத்தில் இருந்து ரூ. 5 கோடியாக உயர்த்தி தனிப்பட்ட அதிகாரம் (Discretionary power) என்ற பிரிவில் ரூ. 5 கோடியாக மாற்றப்பட்டுள்ளது. அந்த கணக்கு குறித்து ஆய்வு செய்ததில், ரூ. 5 கோடி பணத்தில் ரூ.4 கோடி அட்சய பாத்திரம் திட்டத்துக்கு தனியார் அமைப்புக்கு கொடுக்கப்பட்டுள்ளது.

அட்சயபாத்திர திட்டம் துவக்க விழா

இந்த அமைப்பு வழங்கிய உணவு சத்துணவு கூட இல்லை. அரசு இடத்தை வைத்து, அரசு பணத்தை வைத்து, பள்ளி மாணவர்களுக்கு வழங்குவதற்காக பணத்தை எடுத்து கொடுத்துள்ளனர். மேலும் மீதமுள்ள ஒரு கோடி ரூபாய் பணத்தை ஆளுநர் மாளிகையின் கண்ணுக்கு தெரியாதகணக்கிற்கு மாற்றப்பட்டுள்ளது. மீண்டும் அடுத்த ஆண்டு ரூ. 5 கோடி ஒதுக்கப்பட்டுள்ளது. அதில் ஒரு கோடி ரூபாய் தான் அட்சய பாத்திர திட்டத்திற்கு ஒதுக்கப்பட்டுள்ளது. மீதமுள்ள ரூ.4 கோடி வேறொரு கணக்கிற்கு மாற்றப்பட்டது. பிறகு அத்திட்டமே நின்று போனது.

ஒரே நாடு, ஒரே வரி... அரசியலுக்காக சொல்வது எளிது, நடைமுறைபடுத்துவது கடினம் - பிடிஆர் பழனிவேல்!

ஆளுநர் என்ன வேண்டுமானாலும் செய்யலாம் என்று தலைப்பில் பணத்தை கொடுத்துள்ளனர். இந்த பணம் ஏதோ கட்சி நடத்துவதற்காக செலவு செய்யப்பட்டதா என்று அச்சம் வருகிறது. அதோடு, திட்டத்திற்கு ஒதுக்கப்பட்ட நிதியை அந்த நிதி ஆண்டின் இறுதியில் மற்ற கணக்கிற்கு மாற்றுவது சரியல்ல என சி.ஏ.ஜி பலமுறை எச்சரிக்கை விடுத்தும், இதுபோல நடந்துள்ளது. ரூ. 5 கோடி எந்த காரணம் இல்லாமல், யாருக்கும் சொல்லாமல் மறைமுகமாக ஒரு கணக்குக்கு மாற்றப்பட்டுள்ளது ஜனநாயக மரபுக்கு நல்லது கிடையாது. இது நல்ல திட்டமே இல்லை. ரூ.500க்கும் ரூ.1000க்கும் மானிய கோரிக்கையில் சட்டப்பேரவையில் நாம் ஒப்புதல் பெற்று வருகிறோம். ஆனால் ரூ. 5 கோடி யாருக்கும் சொல்லாமல் கணக்கிற்கு மாற்றப்பட்டுள்ளது அரசியலமைப்புக்கு உட்பட்டது தானா?" என கேள்வி எழுப்பினார்.

அதிமுக ஆட்சியில் இந்த விவகாரத்தில் நம்மிடம் பேசிய அ.தி.மு.க முன்னாள் அமைச்சர் டி.ஜெயக்குமார், “பள்ளி மாணவர்களுக்காக ஓர் அற்புதமான திட்டமாக காலை உணவு திட்டம் ‘அட்சயபாத்திரம்' என்கிற பெயரில், ஒரு தனியார் அமைப்பு மூலமாக தொடங்கப்பட்டது. மாணவர்களுக்கான இந்த புதுமையான திட்டத்தை ஊக்கப்படுத்த வேண்டியது அரசாங்கத்தின் முக்கிய கடமை. அதற்காக ரூ.5 கோடி கொடுத்ததில் என்ன தவறு இருக்கிறது. இந்த உன்னதமான திட்டத்தை தொடங்கி வைக்க ஆளுநர் வந்திருந்த போது நானும் சென்றிருந்தேன். சென்றிருந்ததோடு மட்டுமில்லாமல், நானும் என் மகன் ஜெயவர்த்தனனும் எங்களின் ஒரு மாத சம்பளத்தை இந்த திட்டத்துக்காக் கொடுத்திருந்தோம்.

ஜெயக்குமார்

பள்ளிகளில் காலை உணவு திட்டம் கொண்டு வந்த பிறகு பள்ளிக்கு வரும் மாணவர்களின் எண்ணிக்கை அதிகமாகியுள்ளது. இப்படி இருக்கும்போது, இப்போதைய தி.மு.க அரசும் இந்த திட்டத்தை கொண்டு வருகிறார்கள். இதை நாங்கள் தான் முதலில் கொண்டு வந்திருக்கிறோம் என்று பெருமை கொள்ள முடியாது அவர்காளால். எனவே அ.தி.மு.க ஆட்சி காலத்தில் கொண்டு வந்த இந்த சிறப்பான திட்டத்தை லேபிள் ஒட்டிக் கொண்டிருக்கும் தி.மு.க, காழ்புணர்ச்சியினால் இது போன்ற குற்றச்சாட்டுகளை முன் வைக்கிறார்கள்” என்றார்.

from India News https://ift.tt/fuHWc0m